ಸೊನ್ನೆಯ ಮೂಲಕ ಚಿತ್ರಪಾಠ

(ಜಿ.ಎಂ.ಬೊಮ್ನಳ್ಳಿ)

ಸೊನ್ನೆ ಸುತ್ತುವುದರ ಮೂಲಕ ಮಕ್ಕಳಿಗೆ ಚಿತ್ರಕಲೆಯನ್ನು ಕಲಿಸಲು ಮುಂದಾಗಿದ್ದಾರೆ ನಾಡಿನ ಹೆಸರಾಂತ ವ್ಯಂಗ್ಯಚಿತ್ರ ಕಲಾವಿದ ಜಿ. ಎಂ. ಬೊಮ್ನಳ್ಳಿಯವರು.
ನಾಡಿನಾದ್ಯಂತ ತಮ್ಮ ವ್ಯಂಗ್ಯಚಿತ್ರದ ಪಂಚಿನ ಮೂಲಕ ಮನೆಮಾತಾಗಿರುವವರು ಜಿ. ಎಂ. ಬೊಮ್ನಳ್ಳಿಯವರು. ಇವರ ವ್ಯಂಗ್ಯ ಚೊತ್ರ ಪ್ರಕಟಗೊಳ್ಳದ ಪತ್ರಿಕೆಗಳೇ ಇಲ್ಲ ಎನ್ನಬಹುದು. ದಿನಪತ್ರಿಕೆ, ವಾರಪತ್ರಿಕೆ, ಪಾಕ್ಷಿಕ, ಮಾಸಿಕ, ವಿಶೇಷ ಸಂಚಿಕೆಗಳಲ್ಲೆಲ್ಲ ಜಿ. ಎಂ. ಬೊಮ್ನಳ್ಳಿಯವರ ವ್ಯಂಗ್ಯಚಿತ್ರ ಇರಲೇಬೇಕು. ಕನ್ನಡ ದಿನಪತ್ರಿಕೆಗಳಲ್ಲದೇ ಮರಾಠಿ, ಹಿಂದಿ, ಇಂಗ್ಲೀಷ್ ಭಾಷೆಯ ಪತ್ರಿಕೆಗಳಲ್ಲಿಯೂ ಇವರ ವ್ಯಂಗ್ಯಚಿತ್ರಗಳು ಪ್ರಕಟಗೊಂಡಿವೆ.
ಕೃಷಿ ಹಾಗೂ ಪರಿಸರದ ಕುರಿತು ವ್ಯಂಗ್ಯ ಚಿತ್ರಗಳನ್ನು ಬಿಡಿಸುವ ನಾಡಿನ ಏಕೈಕ ವ್ಯಂಗ್ಯಚಿತ್ರ ಕಲಾವಿದ ಎನ್ನುವ ಖ್ಯಾತಿಯನ್ನು ಗಳಿಸಿಕೊಂಡವರು ಜಿ. ಎಂ. ಬೊಮ್ನಳ್ಳಿಯವರು. ತಮ್ಮ ಕುಂಚದ ಪಂಚಿನ ಮೂಲಕ ರಾಜಕಾರಣಿಗಳ, ಹಾದಿ ತಪ್ಪುತ್ತಿರುವ ಸಮಾಜದ ಕಿವಿ ಹಿಂಡಿದವರು ಇವರು. ಒಮ್ಮೆ ಕುಂಚವನ್ನು ಹಿಡಿದರೆಂದರೆ ಸಾಲು ಸಾಲು ಚಿತ್ರಗಳು, ವ್ಯಂಗ್ಯ ಚಿತ್ರಗಳು ಸರಸರನೆ ರೂಪವನ್ನು ಪಡೆದುಕೊಳ್ಳುತ್ತವೆ. ಬಿಡುವಿನ ಸಮಯದಲ್ಲಿ ವಿವಿಧ ಶಾಲೆಗಳಲ್ಲಿಯೂ ಚಿತ್ರಕಲೆಯನ್ನು ಕಲಿಸುವ ಜಿ. ಎಂ. ಬೊಮ್ನಳ್ಳಿಯವರು ಇದೀಗ ಮಕ್ಕಳಿಗೆ ಚಿತ್ರಕಲೆಯನ್ನು ಕಲಿಸಲು `ಸೊನ್ನೆ ಸುತ್ತಿರಿ ಚಿತ್ರ ಕಲಿಯಿರಿ' ಎನ್ನುವ ವಿನೂತನ ಪುಸ್ತಕವೊಂದನ್ನು ಹೊರತರುತ್ತಿದ್ದಾರೆ.

ರಾಜ್ಯ ಸರ್ಕಾರ ಮಕ್ಕಳಲ್ಲಿನ ಸೃಜನಶೀಲತೆಯನ್ನು ಬೆಳಕಿಗೆ ತರಲು ಇನ್ನಿಲ್ಲದ ಪ್ರಯತ್ನವನ್ನು ಪಡುತ್ತಿದೆ. ಕಲಿ ನಲಿ, ನಲಿ ಕಲಿ ಸೇರಿದಂತೆ ವಿವಿಧ ಕಾರ್ಯಕ್ರಮಗಳನ್ನು ಹಮ್ಮಿಕೊಂಡಿದೆ. ಪ್ರತಿಭಾ ಕಾರಂಜಿಯ ಮೂಲಕ ಮಕ್ಕಳ ಮನಸ್ಸಿನೊಳಗೆ ಸುಪ್ತವಾಗಿದ್ದ ಪ್ರತಿಭೆ ಅನಾವರಣಕ್ಕೆ ವೇದಿಕೆಯನ್ನೂ ಕಲ್ಪಿಸಿದೆ. ಚಿತ್ರಕಲೆ ಮಕ್ಕಳ ಮನಸ್ಸಿನ ಭಾವನೆಗಳಿಗೆ ಬಣ್ಣ ತುಂಬುವ ಪ್ರಮುಖ ಮಾರ್ಗ. ವಿಜ್ಞಾನಗಳಂತಹ ಪ್ರಮುಖ ವಿಷಯಗಳಲ್ಲಿ ಚಿತ್ರ ಬಿಡಿಸುವುದಕ್ಕಾಗಿಯೇ ಅಂಕಗಳನ್ನು ನಿಗದಿಪಡಿಸಲಾಗಿದೆ. ಇಂತಹ ಸಂದರ್ಭದಲ್ಲಿ ಮಕ್ಕಳಿಗೆ ಚಿತ್ರಕಲೆಯನ್ನು ಸುಲಭವಾಗಿ ಕಲಿಯಲು ಅನುಕೂಲವಾಗುವಂತೆ ಜಿ. ಎಂ. ಬೊಮ್ನಳ್ಳಿಯವರು ಸೊನ್ನೆಯನ್ನು ಸುತ್ತಿ ನಂತರ ಅದರ ಮೂಲಕ ವಿವಿಧ ಚಿತ್ರಗಳನ್ನು ಬಿಡಿಸಲು ಸುಲಭವಾಗುವಂತೆ ಪುಸ್ತಕವೊಂದನ್ನು ಹೊರತರುತ್ತಿದ್ದಾರೆ.
ಸೊನ್ನೆಯ ಮೂಲಕ ಗಣಪ, ಹಕ್ಕಿ, ಚಿತ್ರ, ಪ್ರಾಣಿಗಳು, ಆನೆ, ಮನುಷ್ಯನ ಮುಖ, ಹೂವು, ಹಣ್ಣು ಹೀಗೆ ನೂರಾರು ಬಗೆಯ ಚಿತ್ರಗಳನ್ನು ರಚಿಸಲು ಸಾಧ್ಯವಿದೆ ಎಂದು ಪುಸ್ತಕದ ಮೂಲಕ ಜಿ. ಎಂ. ಬೊಮ್ನಳ್ಳಿ ತೋರಿಸಿಕೊಡಲು ಹೊರಟಿದ್ದಾರೆ. ಸೊನ್ನೆಯನ್ನು ಬಳಸಿ ನೂರೈವತ್ತಕ್ಕೂ ಹೆಚ್ಚಿನ ಬಗೆಯ ಚಿತ್ರಗಳನ್ನು ಜಿ. ಎಂ. ಬೊಮ್ನಳ್ಳಿ ಬಿಡಿಸಿ ತೋರಿಸಿದ್ದಾರೆ. ಒಂದು ಸೊನ್ನೆ ಎಷ್ಟೆಲ್ಲ ಚಿತ್ರಗಳಿಗೆ ಕಾರಣವಾಗಬಲ್ಲದು ಎನ್ನುವುದನ್ನು ಜಿ. ಎಂ. ಬೊಮ್ನಳ್ಳಿ ಪುಸ್ತಕದಲ್ಲಿ ತೋರಿಸಿದ್ದಾರೆ.

ಜಿ. ಎಂ. ಬೊಮ್ನಳ್ಳಿ ಅವರು ವೃತ್ತಿಯಿಂದ ಕೃಷಿಕರು. ವ್ಯಂಗ್ಯಚಿತ್ರ ರಚನೆ ಅವರ ಹವ್ಯಾಸ. ವ್ಯಂಗ್ಯಚಿತ್ರದ ಜೊತೆಗೆ ಇತರ ಬಗೆಯ ಚಿತ್ರಗಳನ್ನೂ ರಚಿಸುಲ್ಲಿಯೂ ಬೊಮ್ನಳ್ಳಿಯವರು ಸಿದ್ಧಹಸ್ತರು. ಕಳೆದ ಎರಡು ದಶಕಗಳಿಂದ ಇವರು ಬಿಡಿಸಿದ ಚಿತ್ರಗಳು ರಾಜ್ಯ ಹೊರರಾಜ್ಯಗಳ ಪತ್ರಿಕೆಗಳ ಪುಟಗಳನ್ನಲಂಕರಿಸಿವೆ. ಅದೆಷ್ಟೋ ಜನರು ಇವರ ವ್ಯಂಗ್ಯಚಿತ್ರಗಳನ್ನು ಮಿಸ್ ಮಾಡಿಕೊಂಡವರಿದ್ದಾರೆ. ದಿನಬೆಳಗಾದರೆ ಬೊಮ್ನಳ್ಳಿಯವರ ಕಾರ್ಟೂನುಗಳಿಗಾಗಿ ಕಾದು ಕುಳಿತವರಿದ್ದಾರೆ. ಇಂತಹ ಕಲಾವಿದರು ಇದೀಗ ಸೊನ್ನೆ ಸುತ್ತಿರಿ ಚಿತ್ರ ಕಲಿಯಿರಿ ಪುಸ್ತಕದ ಮೂಲಕ ಮಕ್ಕಳ ಪ್ರತಿಭೆ ಬೆಳವಣಿಗೆಗೆ ಕಾರಣರಾಗುತ್ತಿದ್ದಾರೆ.
ಇವರ ಈ ಪುಸ್ತಕ ಇದೀಗ ಬಿಡುಗಡೆಯ ಹಂತದಲ್ಲಿದೆ. 50 ಪುಟಗಳ ಸೊನ್ನೆ ಸುತ್ತಿರಿ ಚಿತ್ರ ಕಲಿಯಿರಿ ಪುಸ್ತಕಕ್ಕೆ 40 ರು. ಬೆಲೆಯಿದೆ. ಆದರೆ ಮಕ್ಕಳ ಬದುಕು ರೂಪುಗೊಳ್ಳಲು ನೆರವಾಗಲಿ ಎನ್ನುವ ದೃಷ್ಟಿಯಿಂದ ಲಾಭ-ನಷ್ಟದ ಗೋಜಿಗೆ ಹೋಗದೇ 30 ರು.ಗೆ ಕೊಡುತ್ತೇನೆ ಎಂದು ಬೊಮ್ನಳ್ಳಿಯವರು ಹೇಳುತ್ತಾರೆ. ಸೊನ್ನೆಯ ಮೂಲಕ ಚಿತ್ರವನ್ನು ಬಿಡಿಸುತ್ತ ಸಾಗಿದಂತೆ ಮಕ್ಕಳ ಅಕ್ಷರ ಸುಂದರಾವಗುತ್ತದೆ. ಜೊತೆ ಜೊತೆಯಲ್ಲಿಯೇ ಏಕಾಗ್ರತೆಯೂ ಮೂಡುತ್ತದೆ. ಚಿತ್ರಗಳಿಗೆ ಬಣ್ಣಗಳನ್ನು ತುಂಬಿದರಂತೂ ಮಕ್ಕಳ ಮನಸ್ಸಿನೊಳಗಿನ ಭಾವನೆಗಳಿ ಜೀವತಳೆದಂತಾಗುತ್ತವೆ. ಶಿಕ್ಷಣ ಇಲಾಖೆ ಇಂತಹ ಕಲಾವಿದರ ಪ್ರಯತ್ನಗಳಿಗೆ ಪ್ರೋತ್ಸಾಹ ನೀಡಬೇಕಾದ ಅಗತ್ಯವಿದೆ.

ಮಕ್ಕಳ ಪ್ರತಿಭೆ ಅನಾವರಣ ಹಾಗೂ ಅವರ ಬೌದ್ಧಿಕ ಮಟ್ಟ ವಿಕಾಸವಾಗಲು ಶಿಕ್ಷಣ ಇಲಾಖೆ ಹಲವಾರು ಯೋಜನೆಗಳನ್ನು ಕೈಗೊಳ್ಳುತ್ತಿದೆ. ಏನೆಲ್ಲ ಕಸರತ್ತನ್ನು ಮಾಡಿ ಹೊಸ ಹೊಸ ಶಿಕ್ಷಣ ವಿಧಾನಗಳನ್ನು ಪರಿಚಯಿಸುತ್ತಿದೆ. ಜಿ. ಎಂ. ಬೊಮ್ನಳ್ಳಿಯವರ ಈ ಪ್ರಯತ್ನ ಸರಳವೂ, ಉತ್ತಮವಾದುದೂ ಆಗಿದೆ. ಸುಲಭವಾಗಿ ಕಲಿಯಬಹುದಾದದ್ದು. ಶಿಕ್ಷಣ ಇಲಾಖೆ ಇಂತಹ ಪ್ರಯತ್ನಗಳನ್ನು ಪ್ರೋತ್ಸಾಹಿಸುವುದರ ಜೊತೆಗೆ ಪಠ್ಯದಲ್ಲಿ ಸೇರ್ಪಡೆಗೊಳಿಸಿದರೆ ಮಕ್ಕಳ ಬದುಕಿಗೆ ಇನ್ನಷ್ಟು ಸಹಕಾರಿಯಾಗಲಿದೆ.
ಜಿ. ಎಂ. ಬೊಮ್ನಳ್ಳಿ ಅವರನ್ನು ಸಂಪರ್ಕಿಸಬಹುದಾದರೆ : 9480789702
**
ಸೊನ್ನೆ ಹಲವು ಸಾಧ್ಯತೆಗಳ ಪ್ರತೀಕ. ಸೊನ್ನೆಯ ಮೂಲಕ ಚಿತ್ರ ಬಿಡಿಸುವುದನ್ನು ಕಲಿಯುವುದು ಸುಲಭ. ಸೊನ್ನೆಯಿಂದ ಯಾವುದೇ ಆಕಾರವನ್ನೂ ರಚಿಸಬಹುದಾಗಿದೆ. ಈ ನಿಟ್ಟಿನಲ್ಲಿ ಸೊನ್ನೆ ಬಿಡಿಸಿರಿ ಚಿತ್ರ ಕಲಿಯಿರಿ ಮಕ್ಕಳಿಗೆ ಬಹಳಷ್ಟು ಸಹಕಾರಿಯಾಗಲಿದೆ. ಮಕ್ಕಳ ವಿಕಾಸಕ್ಕೆ ನನ್ನದೊಂದು ಚಿಕ್ಕ ಪ್ರಯತ್ನ. ಈ ನಿಟ್ಟಿನಲ್ಲಿ ಸರ್ಕಾರ ಯಾವ ರೀತಿಯ ಸಹಕಾರ, ಸಹಾಯವನ್ನು ಮಾಡುತ್ತದೆ ಎನ್ನುವುದೂ ಬಹಳ ಮುಖ್ಯ.
ಜಿ. ಎಂ. ಬೊಮ್ನಳ್ಳಿ
****

(ಈ ವರದಿ ಜೂ.14ರ ಕನ್ನಡಪ್ರಭದಲ್ಲಿ ಪ್ರಕಟಗೊಂಡಿದೆ)