ಶ್..! ಸೀರಿಯಸ್ ಹನಿಗಳು

* ಹುಚ್ಚು ಪ್ರೀತಿ*

ಅವನು ಅವಳನ್ನು
ಹುಚ್ಚನಂತೆ ಪ್ರೀತಿಸಿದ |
ಬದುಕು ಅರ್ಪಿಸಿದ ||
ಕೊನೆಗೆ ಆ ಪ್ರೀತಿ
ಅವಳಿಗೆ ಒಂದು
ಹುಚ್ಚಾಸ್ಪತ್ರೆಯಲ್ಲಿ ಸಿಕ್ಕಿತು ||


*ನಗ್ನ ಸತ್ಯ*

ದೀಪ ಆರಿದಾಗ
ಬದುಕೆಲ್ಲ ಕತ್ತಲು |
ಬಟ್ಟೆ ಬಿಚ್ಚಿದಾಗ
ಬರಿ ಬೆತ್ತಲು
ಸುತ್ತಲೂ ||


*ಗಾಂಧಾರಿಯ ಮಗ*

ಗಾಂಧಾರಿಯ ಮನದೊಳಗಣ
ಸುಪ್ತ ಧೂರ್ತತನಗಳ
ಮೂರ್ತ ರೂಪವೇ
ದುರ್ಯೋಧನ ||

*ಬಾರಿ*

ಅತ್ತೆಗೊಂದು ಬಾರಿ
ಸೊಸೆಗೊಂದು ಬಾರಿ
ಆದರೆ ಬಡವನ
ಪಾಲಿಗೆ ಇರುವುದೊಂದೇ
ದುಬಾರಿ ||

*ಸಂಸಾರ*

ಸಂಸಾರವೆಂದರೆ
ನಿಸ್ಸಾರ ಎಂದೆಲ್ಲಾ
ಹೇಳಿದ ಕವಿಗಳಿಗೆ
ಕೊನೆಗೂ ಗೊತ್ತಾಗಲಿಲ್ಲ
ಅದರಲ್ಲೂ  SOME
ಸಾರವಿದೆ ಎಂಬುದು ||

*ವಿರಹಧಾರೆ*

ಸೂರ್ಯ-ಚಂದ್ರರ ಪ್ರೇಮದ
ಕಣ್ಣಾಮುಚ್ಚಾಲೆಯಲ್ಲಿ
ಬೆಂದುಹೋದ ಭುವಿ
ಮಳೆಯಾಗಿ ಕಣ್ಣೀರು
ಸುರಿಸಿದಳು ||

*ಒಡಲಾಳ-1*

ಮಳೆ ಭೂಮಿಯೊಳಗಿನಿಂದ
ಬರತೊಡಗಿದರೆ ಏನಾಗುತ್ತೆ..?
ಸಿಡಿಲು-ಗುಡುಗು
ಭುವಿಯಲ್ಲಿ ಹುಟ್ಟುತ್ತೆ..||

*ಒಡಲಾಳ-2*

ಮಳೆ ಭೂಮಿಯೊಳಗಿನಿಂದ
ಬರತೊಡಗಿದರೆ
ಏನಾಗುತ್ತೆ..?
ಲಾವಾರಸ ಆಕಾಶದಿಂದ
ತೊಟ್ಟಿಕ್ಕುತ್ತದೆ ಅಷ್ಟೆ..||


*ಗೆಲುವು*

ಆತ ಅವಳ ಜೊತೆಗೆ
ಕಾಂಪಿಟೇಶನ್ನುಗಳಲ್ಲಿ
ಸೋತು ಸೋತು
ಅವಳ ಮನಸ್ಸನ್ನೇ
ಗೆದ್ದುಕೊಂಡುಬಿಟ್ಟ ||

*ಬೆಳಗು*

ಆಗಸದ ತುಟಿಗಳು
ಭುವಿಯ ಚುಂಬನದಿಂದ
ರಂಗೇರಿದೆ |
ಒಂದರೆಗಳಿಗೆಯಲ್ಲಿ ಬಾಳ
ಕತ್ತಲೆ ಮರೆತು ರಂಗು
ರಂಗಾಗಿ ಬೆಳಕಾಗುತ್ತಿದೆ ||

*ಬಾ-ನಲ್ಲ*

ಓಹ್... ಆ ಆಗಸವೇಕೆ
ಕೆಂಪು ಕೆಂಪಾಗಿದೆ..?
ಬಹುಶಃ ಅದಕ್ಕೆ
ಭುವಿಯ ನಲ್ಲನ
ಆಗಮನದ ಸುದ್ದಿಯ
ಅರಿತಿರಬೇಕು ||

*ನಾಚುವ ನೇಸರ*

ಸೂರ್ಯನಿಗೂ ಪ್ರಿಯತಮೆ ಭೂಮಿ
ಎಂದರೆ ಆಗಾಗ ನಾಚಿಕೆ |
ಅದಕ್ಕೇ ಆತ ಮೋಡದಲ್ಲಿ
ಮರೆಯಾಗುತ್ತಾನೆ ||

****
(ಲೈಟ್ ಕಾಮಿಡಿನ ಎಷ್ಟು ದಿನ ಅಂತ ಬರೀತಿಯಾ..? ಒಂಚೂರು ಸೀರಿಯಸ್ ಆದ ಬರಹಗಳನ್ನು ಬರಿ ಎಂದವರು ಕೆಲವರು. ಹಾಗೆ ನನಗೆ ಬರೆಯಲು ಬರುವುದೇ ಇಲ್ಲ ಎಂದುಕೊಂಡಿದ್ದೆ. ಒತ್ತಾಯ ಮಾಡಿದರು ದೋಸ್ತರು. ಸುಮ್ಮನೆ ನೋಡುವಾ ಎಂದು ಬರೆದಿದ್ದೇನೆ.. ಈ ರೀತಿಯಾಗಿದೆ.. ಹೇಗಿದೆ ಎನ್ನುವುದು ನಿಮ್ಮ ಅಭಿಪ್ರಾಯದಿಂದ ತಿಳಿಯಬೇಕು.. ಹೇಳ್ತೀರಲ್ವಾ.?)