ಹಿಸೆ ಪಂಚಾಯತ್ಗೆ
ದೊಡ್ಡ ದೊಡ್ಡ ಪಂಚರು ಸೇರಿದ್ದ
ಸಂಜೆ ಹೊತ್ತಿಗೆ ||
ಗಂಡ್ ಮಕ್ಕ ಐದು ಜನ
ಪಾಲು ಕೇಳ್ತಿದ್ದ
ಮನೆ ಯಜಮಾನ್ ಸುಬ್ಬಣ್ಣಯ್ಯ
ಸಿಟ್ಟು ಮಾಡ್ತಿದ್ದ ||
ಜಮೀನಿತ್ತು ಐದೆಕರೆ
ತೋಟ ಅರ್ಧಮರ್ಧ
ಗದ್ದೆಲೆಂತೂ ಬೆಳಿತಿತ್ತಿಲ್ಲೆ
ಜಟಾಪಟಿ ನಡೆಸಿದ್ದ ||
ತುದಿಮನೆ ಗಪ್ಪಜ್ಜ
ಪಂಚರಲ್ಲೇ ಹಿರಿಯ
ಅಂವ ಹೇಳಿದ್ದೆ ಕೊನೆಯ ಮಾತು
ಎದುರು ಆಡಲಡಿಯ ||
ಸೋಮನಳ್ಳಿ ಶಿರಿ ಹೆಗಡೇಗೂ
ಪಂಚನ ಪಾರ್ಟು ಕೊಟ್ಟಿದ್ದ
ಹೊಸ ಮನೆ ಒಡೆದು ಹಾಕಲೆ
ಪಟ್ಟಾಗಿ ಕುಳಿತಿದ್ದ ||
ಹುಲಿ ಹೊಡೆದಿದ್ ಸುಬ್ಬಜ್ಜನೂ
ಪಂಚರ ಸಾಲು ಹೊಕ್ಕಿದ್ದ
ಮಾತಾಡಿದ್ರೆ ಮುಗಿದೇ ಹೋತು
ನ್ಯಾಯ ತೀರ್ಮಾನ ಮಾಡ್ತಿದ್ದ ||
ಪಕ್ಕದಮನೆ ಮಂಜಣ್ಣ
ಸುಮ್ಮಂಗಿಪ್ಪವಲ್ಲ
ಪಂಚರ ಸಾಲಲ್ ಇರದೇ ಇದ್ರೆ
ತಂಡು ಕೂರವಲ್ಲ ||
ಯಂಗ್ಲೂರಲ್ಲೇ ದೊಡ್ಡ ಮನೆ
ಹಿಸೆಯಾಗಲೆ ಹಣಕಿತ್ತು
ಮನೆ ಒಡೆಯದ್ ನೋಡಲಂತೂ
ಸುಮಾರ್ ಮನಸು ಕಾದಿತ್ತು ||
ನಾಲ್ಕೈದ್ ದಿನ ಪಂಚಾಯ್ತಿ
ನಡೆದರೂ ಕೂಡ
ಹಿಸೆಯಪ್ಪವ್ಕೆ ಒಮ್ಮನಸು
ಮೂಡ್ಲೇ ಇಲ್ಲ ನೋಡ ||
ಪಂಚಾಯತಿಕೆ ನಡೆಯುವಾಗ
ನಾಲ್ಕೈದು ಸಾರಿ ಚಾ ಆತು
ಮ್ಯಾಲಿಂದ ಮೇಲೆ ಮಾಡಿಟ್ಟಿದ್ದ
ಅವಲಕ್ಕಿ ಚುಡವಾ ಮುಗದಿತ್ತು ||
ಪದೆ ಪದೆ ಪಂಚಾಯತಿಕೆ
ಮುಂದ್ ಮುಂದಕ್ಕೆ ಹೋಗ್ತಿತ್ತು
ಎಷ್ಟು ಸಾರಿ ಒಟ್ ಗೂಡಿದ್ರೂ
ಮುಂದಿನ ದಿನಾಂಕ ಸಿಕ್ತಿತ್ತು ||
ಮತ್ತೆ ನಡೆದ ಪಂಚಾಯತಿಕೆ
ಫುಲ್ ಫೇಲ್ ಆಗೋಜು
ಎಲ್ಲಾ ಒಪ್ಪಿರೂ ಮನಸಾಜಿಲ್ಲೆ
ಪಂಚಾಯತಿಕೆ ಮುಂದಕ್ ಹೋಗಾಜು ||
**
(ನಾನು ಕಂಡ ಒಂದು ಹಿಸೆ ಪಂಚಾಯತಿಕೆಯನ್ನು ಹವ್ಯಕ ಶೈಲಿಯ ಹಾಡಿನ ಮೂಲಕ ಹೇಳುವ ಪ್ರಯತ್ನ ಇದಾಗಿದೆ. ಬಹಳ ದಿನಗಳ ಕಾಲ ನಡೆದ ಹಿಸೆ ಪಂಚಾಯತಿಕೆಯನ್ನು ಒಂದೇ ಕಂತಿನಲ್ಲಿ ಹೇಳಲು ಅಸಾಧ್ಯವಾದ ಕಾರಣ ಮುಂದಿನ ಕಂತುಗಳಿಗೂ ವಿಸ್ತರಿಸುವ ಪ್ರಯತ್ನ ಮಾಡಿದ್ದೇನೆ. ಸಾಕಷ್ಟು ದೀರ್ಘವೂ, ವಿಚಿತ್ರವೂ, ಕಣ್ಣೀರು ಜನಕವೂ ಆಗಿದ್ದ ಆ ಹಿಸೆ ಪಂಚಾಯತಿಕೆಯ ಮೊದಲ ಭಾಗ ಈ ಮೂಲಕ ನಿಮ್ಮ ಮುಂದೆ ಇಟ್ಟಿದ್ದೇನೆ. ನಿಮಗಿಷ್ಟವಾಗಬಹುದು.. )
No comments:
Post a Comment