ಲೋಕಸಭಾ ಟಿಕೆಟ್ ಪಡೆಯಲು ಕೆಲವು ಸೂತ್ರಗಳು

                 ಲೋಕಸಭಾ ಟಿಕೆಟ್ ಬೇಕಾದರೆ ತಾವು ಈ ಸೂತ್ರಗಳನ್ನು ಅಳವಡಿಸಿಕೊಳ್ಳಿ. ನಿಮಗೆ ಟಿಕೆಟ್ ಲಭ್ಯವಾಗುತ್ತದೆ. ಈ ಸೂತ್ರಗಳನ್ನು ಗಂಭೀರವಾಗಿ ಪರಿಗಣಿಸಿದರೆ ಟಿಕೆಟ್ ಸಿಗಬಲ್ಲದು. ಫನ್ನಿಯಾಗಿ ತೆಗೆದುಕೊಂಡರೆ ನಿಮ್ಮ ಮೂಡು ಸರಿಯಾಗಬಹುದು. ಯಾವ ಯಾವ ಪಕ್ಷಗಳ ಟಿಕೆಟ್ ಬೇಕಾದರೆ ಯಾವ ಯಾವ ರೀತಿ ಮಾಡಬೇಕು ಎನ್ನುವುದು ಇಲ್ಲಿದೆ ನೋಡಿ. ಬಿಜೆಪಿ, ಕಾಂಗ್ರೆಸ್, ಜೆಡಿಎಸ್, ಆಮ್ ಆದ್ಮಿ ಪಕ್ಷಗಳು ಹಾಗೂ ಇತರೆ ಕೆಲವು ಪಕ್ಷಗಳ ಟಿಕೆಟ್ ಬೇಕಾದಲ್ಲಿ ನೀವು ಅನುಸರಿಸಬೇಕಾದ ಸೂತ್ರಗಳು ಇಲ್ಲಿವೆ. ನಿಮಗೆ ಖಂಡಿತ ಇಷ್ಟವಾಗಬಹುದು.

ಬಿಜೆಪಿ ಟಿಕೆಟ್ ಬೇಕಾದರೆ
1) ದೇಶ ಕಟ್ಟುವ ಮಾತುಗಳನ್ನು ದೊಡ್ಡ ದೊಡ್ಡ ರೂಪದಲ್ಲಿ ಆಡಿ.
2) ಆಗಾಗ ರಾಮ ಹಾಗೂ ರಾಮಮಂದಿರದ ಭಜನೆ ಮಾಡಿ
3) ರಾಷ್ಟ್ರಭಕ್ತಿ, ರಾಷ್ಟ್ರಪ್ರೇಮದ ಕುರಿತು ಮಾತನಾಡಿ
4) ಆಗಾಗ ಮುಸ್ಲಿಮರಲ್ಲಿ ನಮ್ಮ ತಪ್ಪಿದ್ದರೆ ಕ್ಷಮೆ ಇರಲಿ ಎಂದೂ ಹೇಳಿ
5) ಭ್ರಷ್ಟಾಚಾರದ ವಿರುದ್ಧ ಉದ್ದುದ್ದದ ಭಾಷಣ ಬಿಗಿಯಿರಿ
6) ನಮೋ ಭಜನೆ ಮಾಡಿ
7) ಪತ್ರಿಕೆಗಳಲ್ಲಿ ನರೇಂದ್ರ ಮೋದಿ ಹಾಗೂ ರಾಷ್ಟ್ರಪ್ರೇಮದ ಕುರಿತು ಸರಣಿ ಲೇಖನಗಳನ್ನು, ಅಂಕಣಗಳನ್ನು ಬರೆಯಿರಿ


ಕಾಂಗ್ರೆಸ್ ಟಿಕೆಟ್ ಬೇಕಾದರೆ
1) ಮೋದಿಯವರನ್ನು ಯದ್ವಾ ತದ್ವಾ ಬಯ್ಯಿರಿ
2) ಮೋದಿಯವರನ್ನು ಕೋಮುವಾದಿ ಎನ್ನಿ
3) ರಾಹುಲ್ ಗಾಂಧಿ ಮುಂದಿನ ಪ್ರಧಾನಿ ಎಂದು ಆಗಾಗ ಹೇಳಿ
4) ಸೋನಿಯಾಗಾಂದಿಗಿಂತ ಮಹಾನ್ ನಾಯಕರಿಲ್ಲ ಎಂದು ಹೇಳುತ್ತಿರಿ
5) ಹಿಂದುಳಿದವರು, ಅಲ್ಪಸಂಖ್ಯಾತರ ಧ್ಯೇಯವೇ ಪರಮಗುರಿ ಎಂದು ಭಾಷಣ ಕೊಚ್ಚಿ
6) ಮುಸ್ಲಿಮರನ್ನು ಎಷ್ಟು ಸಾಧ್ಯವೋ ಅಷ್ಟು ಓಲೈಕೆ ಮಾಡಿ
7) ದೇವಸ್ಥಾನವೊಂದನ್ನು ಬಿಟ್ಟು ಆಗಾಗ ಚರ್ಚು, ಮಸೀದಿಗಳಿಗೆ ಹೋಗಿ ಬರುತ್ತಿರಿ

ಜೆಡಿಎಸ್ ಟಿಕೆಟ್ ಬೇಕಾದರೆ
1) ಸ್ವಲ್ಪ ಕಾಲ ಬಿಜೆಪಿ, ಸ್ವಲ್ಪ ಕಾಲ ಕಾಂಗ್ರೆಸ್ ಪಕ್ಷದಲ್ಲಿದ್ದು ಬಂಡೆದ್ದು ಬನ್ನಿ
2) ಅಪ್ಪ-ಮಗನ ಭಜನೆ ಮಾಡಿ
3) ನಿದ್ದೆಯನ್ನು ನಿಮ್ಮ ಖಾಯಂ ಹವ್ಯಾಸವನ್ನಾಗಿ ಮಾಡಿಕೊಳ್ಳಿ
4) ಬೇರೆ ಪಕ್ಷದಿಂದ ಪಕ್ಷಾಂತರ ಮಾಡಿ ಬಂದ ತಕ್ಷಣ ಆ ಪಕ್ಷಗಳನ್ನು ಯದ್ವಾ ತದ್ವಾ ಬೈಯಿರಿ
5) ತಮ್ಮನ್ನು ಬಿಟ್ಟು ಉಳಿದವರೆಲ್ಲರೂ ಮೋಸಗಾರರು ಎಂದು ಹೇಳಿರಿ
6) ಅಪ್ಪ-ಮಗ-ಸೊಸೆ-ಮೊಮ್ಮಗನ ಪೋಟೋಕ್ಕೆ ಆಗಾಗ ಪೂಜೆ ಮಾಡುವ ಪೋಸು ಕೊಡಿ
7) ಭವಿಷ್ಯ, ಜಾತಕ, ನಂಬಿಕೆ, ಮಾಟ, ಮಂತ್ರ ಇವುಗಳಲ್ಲೆಲ್ಲ ಸಿಕ್ಕಾಪಟ್ಟೆ ನಂಬಿಕೆ ಇದೆ ಎನ್ನುವುದನ್ನು ಆಗಾಗ ಪ್ರೂವ್ ಮಾಡಿ ತೋರಿಸಿ

ಉಳಿದಂತೆ ಇರುವುದು ದಿ ಗ್ರೇಟ್ ಆಮ್ ಆದ್ಮಿ ಪಕ್ಷ.
1) ಭ್ರಷ್ಟಾಚಾರದ ವಿರೋಧಿ ಉಪವಾಸ ಮಾಡಿ
2) ಭ್ರಷ್ಟಾಚಾರ ವಿರೋಧಿ ಭಾಷಣ ಹಾಗೂ ಪ್ರತಿಭಟನೆಗಳನ್ನು ಸರಣಿಗಳಂತೆ ಮಾಡಿ, ಆಗಾಗ ಮಾಧ್ಯಮದವರನ್ನು ಜೈಲಿಗೆ ಅಟ್ಟುತ್ತೇನೆ ಎಂದು ಗುಡುಗಿ
3) ನಿಮಗೆ ಯಾರು ಆಗುವುದಿಲ್ಲವೋ ಅವರನ್ನು ನರೇಂದ್ರ ಮೋದಿ ಹಾಗೂ ಅಂಬಾನಿ ಏಜೆಂಟ್ ಎಂದು ಬಯ್ಯಿರಿ
4) ಜನಸಾಮಾನ್ಯ ಎಂದು ಬಿಂಬಿಸಿಕೊಳ್ಳಲು ರೈಲು, ಬೈಕು, ಕಾರು, ಸೈಕಲ್ಲು, ಬಸ್ಸು ಸೇರಿದಂತೆ ಎಷ್ಟು ಸಾಧ್ಯವೋ ಅಷ್ಟು ಜನಸಾಮಾನ್ಯರ ಗಾಡಿಯಲ್ಲಿ ಓಡಾಡಿ ಅವರಿಗೆ ಕಿರಿ ಕಿರಿ ಉಂಟು ಮಾಡಿ
5) ಕುತ್ತಿಗೆಗೆ ಒಂದು ಮಫ್ಲರ್ ಹಾಕಿಕೊಂಡು ಸದಾಕಾಲ ಓಡಾಡಿ
6) ಯಾವುದೇ ಕ್ಷೇತ್ರದಲ್ಲಿ ಬೇಕಾದರೂ ಗುರುತಿಸಿ ತಾಕತ್ತಿದ್ದರೆ ನನ್ನ ವಿರುದ್ಧ ಸ್ಪರ್ಧೆ ಮಾಡಿ ಎಂದು ಮೋದಿಗೆ ಸವಾಲು ಹಾಕಿ
7) ಪ್ರತಿಭಟನೆಯ ವಿರುದ್ಧ ಪ್ರತಿಭಟನೆ ಮಾಡಿ ನೀವೊಬ್ಬ ಉಗ್ರ ಪ್ರತಿಭಟನಾಕಾರ ಎಂಬುದನ್ನು ಸಾಬೀತು ಮಾಡಿ