ಹಳೆಯ ನೆನಪು

ಹಳೆಯ ನೆನಪು

ಹಳೆಯ ಸಾಲಿಗೆ ಹೊಸತು ರಾಗವ
ಮನಸು ಸುಮ್ಮನೆ ಬೆಸೆದಿದೆ,
ಅಳಿದ ನೆನಪಿನ ತಳದ ಬುತ್ತಿಯ
ಮನವು ಮತ್ತೆ ಮೀಟಿದೆ..||

ಹಳೆಯ ಕವಿತೆಯ ಪದದ ಸಾಲಿಗೆ
ಹೊಸತು ಅರ್ಥವೆ ಹುಡುಕಿದೆ,
ಮೆಲ್ಲ ಮೆಲ್ಲನೆ ನಿನ್ನ ನೆನಪೇ
ಝಲ್ಲನೆದೆಯನು ತಟ್ಟಿದೆ..||

ಮರೆತು ಹೋದಕವನವೇಕೋ
ಮಧುರವೆನಿಸುತ ಮರಳಿದೆ,
ಕಳೆದು ಹೋಗಿಹ ಪದ ಸಮೂಹವೆ
ಹಾಡಲಾಗದೆ ಉಳಿದಿದೆ..||

ಹಳೆಯ ನೆನಹದು ಅಲೆಯ ತೆರದಲಿ
ಮನದ ದಡವನು ಮುತ್ತಿದೆ,
ಮರೆತೆನೆಂದರೂ ನಿನ್ನ ನೆನಪೇ
ಮನದ ಮಡಿಲಲಿ ಇಣುಕಿದೆ..||

(ಬರೆದಿದ್ದು ದಂಟಕಲ್ಲಿನಲ್ಲಿ ದಿ. 28.092008ರಂದು)