ದಿಙ್ಮೂಢ ಕವಿತೆಗಳು

ಟಾರು ರೋಡಿನಲ್ಲಿ

ವೇಗವಾಗಿ ಬೈಕಿನಲ್ಲಿ

ಸಾಗುತ್ತಿದ್ದೆ..

ಕಪ್ಪು ಬೆಕ್ಕು

ಬೈಕಿಗಡ್ಡವಾಗಿ

ಓಡಿ ಬಂದಿತು..

ಅಪಶಕುನ ಮುಂಡೇದು

ಬೈಕಿನ ಚಕ್ರಕ್ಕೆ ಸಿಲುಕಿ 

ಸತ್ತು ಹೋಯಿತು ||

***

ಬೆಳಿಗ್ಗೆ ಮುಂಚೆ

ಹಾಗೆ ಸುಮ್ಮನೆ

ಎಡಗಣ್ಣು 

ಅದುರಿತು

ಕಣ್ಣು ತಿಕ್ಕಿದೆ,

ರೆಪ್ಪೆಗೂದಲು 

ಕಿತ್ತು ಬಂದಿತು ||

**

ಶುಭಕಾರ್ಯಕ್ಕೆ

ಹೊರಟ ವೇಳೆ

ಬೋಳು ಹಣೆಯ ಮುದುಕಿ

ಸಮಾ ಎದುರಿಗೆ ಸಿಕ್ಕಳು

ಮುದಿಕಿಯೀಗ

ಹೊಸ ಮೇಕಪ್ 

ಬಾಕ್ಸು ಕೊಂಡಿದ್ದಾಳಂತೆ ||

***

 ರಸ್ತೆಯಲ್ಲಿ ಪದೇ ಪದೆ

ಎಡಗಾಲು  ಕಲ್ಲಿಗೆ ತಾಗಿ

ಎಡವಿತು.

ಕಲ್ಲು ಕಿತ್ತು ಬಂದಿತು ||

 **

ಕುತೂಹಲದಿಂದ

ಜ್ಯೋತಿಷಿಗಳ ಬಳಿ

ಭವಿಷ್ಯ ಕೇಳಿಸಲು

ಜಾತಕ ಕೊಟ್ಟೆ

ಭವಿಷ್ಯ ಹೇಳುವ ಮುನ್ನ

ಜ್ಯೋತಿಷಿಗಳು

ಇನ್ನಿಲ್ಲವಾದರು ||

***

ದಾರಿಯಲ್ಲಿ ಸಾಗುವಾಗ

ಅಡ್ಡಬಂದಿತು ನರಿ,

ಮುಖ ಸರಿಯಾಗಿ ಕಾಣಲಿಲ್ಲ,

ನೋಡಣವೆಂದು ಬೆನ್ನಟ್ಟಿದೆ

ಅಡ್ಡಗಟ್ಟಿ ಮುಖ ನೋಡಿದೆ

ಶನಿ ಮುಂಡೆಗಂಡನ

ಮುಖ ನೋಡಿದೆ..

ಇನ್ನು ನನ್ನ ಕೆಲಸ ಆದಂತೆ

ಎಂದು ಗೊಣಗಿದ ನರಿ

ವಾಪಾಸು ಮರಳಿತು ||

***

ನಾನು ಎರುದು ಬಂದಾಗ 

ಆತ ಒಂಟಿ ಸೀನು ಸೀನಿದ,

ನನಗೆ ಶೀತವಾಯಿತು ||

**

ಮತ್ತೊಮ್ಮೆ ಖಾಲಿಕೊಡ

ಎದುರು ಬಂದಿತು

ಶಿವ ಶಿವಾ ಎಂದುಕೊಂಡೆ

ಮನಸ್ಸು ಖಾಲಿಯಾಯಿತು ||

***

(ಬರೆದಿದ್ದು : ಶಿರಸಿಯಲ್ಲಿ, ನವೆಂಬರ್ 23, 2013ರಂದು)