ಅವಳು

ಅವಳು...
ನುಡಿ ಮುತ್ತಾಗಿದ್ದಳು
ಸ್ಪೂರ್ತಿಯ ತೊತ್ತಾಗಿದ್ದಳು

ನಲಿವು ನೀಡುತ್ತ
ಮನಸಿನಲಿ ಮೆರೆಯುತ್ತ
ಕಾಣದಲೇ ಮಾಯವಾದಳು ||

ಅವಳು...
ತುಟಿಯ ನಗುವಾಗಿದ್ದಳು
ಜೊತೆಗೆ ಮಗುವಾಗಿದ್ದಳು

ಏನೇನೋ ಹುಡುಕುತ್ತ
ಎಲ್ಲೆಲ್ಲೊ ಅಲೆಯುತ್ತ
ಕತ್ತಲಲಿ ಕರಗಿ ಹೋದಳು ||

ಅವಳು...
ಒಂದು ಹಾಡಾಗಿದ್ದಳು
ಸಂತಸದ ಗೂಡಾಗಿದ್ದಳು

ಎಲ್ಲೆಲ್ಲೋ ಎಡವುತ್ತ
ಏನೇನೋ ತಡವುತ್ತ
ಕಣ್ಣಂಚಿನಿಂದ ಮರೆಯಾದಳು ||

ಅವಳು...
ಹೂವಂತ ಮನಸಾಗಿದ್ದಳು
ಪ್ರೀತಿಯನು ಅರಿತಿದ್ದಳು

ಮನಸನ್ನು ತಿಳಿಯುತ್ತ
ನನಸನ್ನು ಬಯಸುತ್ತ
ಕೊನೆಗೊಮ್ಮೆ ಆಕೆ ಕನಸಾದಳು ||

ಅವಳು...
ಒಲವ ಸವಿಯಾಗಿದ್ದಳು
ಜೊತೆಗೆ ಕವಿಯಾಗಿದ್ದಳು

ಹೊಸ ಹಾಡ ಕಟ್ಟುತ್ತ
ಹಳೆ ನೆನಪ ಮೆರೆಸುತ್ತ
ಕೊನೆಗೊಮ್ಮೆ ಎಲ್ಲೂ ಕಾಣದಾದಳು ||

ಅವಳು...
ಜೀವದ ಸೆಲೆಯಾಗಿದ್ದಳು
ಕರುಣೆಯ ಬಲೆಯಾಗಿದ್ದಳು

ಪ್ರೀತಿ ಬೆಲೆ ತಿಳಿಸುತ್ತ
ಹೊಸ ಅಲೆಯ ಬೆಳೆಸುತ್ತ
ಬೇರೆಲ್ಲೋ ನೆಲೆಯ ಕಂಡುಕೊಂಡಳು ||

***

(ಈ ಕವಿತೆಯನ್ನು ಬರೆದಿರುವುದು ದಂಟಕಲ್ಲಿನಲ್ಲಿ 21-11-2005ರಂದು)