ಹುರುಪು

ಕಳೆದು ಹೋಗಲಾರೆ ನಾನು

ಮತ್ತೆ ಮತ್ತೆ ಹುಟ್ಟುವೆ

ಹೊಸ ಚೇತನದುತ್ಸಾಹದಿ

ಜಗದ ಮೇರು ಮುಟ್ಟುವೆ |

ನವನವೀನ ಭಾವಗಳನು

ಮನಸಲ್ಲಿ ತುಂಬುವೆ

ಕಳೆದು ಹೋಗದಂತೆ ನಾನು

ಶರದಿಯತ್ತ ಜಿಗಿಯುವೆ |

ಪ್ರೀತಿ ಸ್ನೇಹ ತ್ಯಾಗ ಮೋಹ

ಕೂಡಿಕೊಂಡು ಬಾಳುವೆ

ಕಳಚಿದರೂ ಕೂಡಿದರೂ

ಮನದ ತುಂಬ ಒಲವೇ |

ರಾಶಿ ರಾಶಿ ಕನಸುಗಳನು

ಬೊಗಸೆಯಲ್ಲಿ ಹಿಡಿಯುವೆ

ಕಳೆದುಕೊಳ್ಳಲಾಗದಂತೆ

ಕೂಡಿಟ್ಟು ಪಡೆಯುವೆ |

ಬದುಕಿನಲ್ಲಿ ಕುಗ್ಗಿದರೂ

ಮತ್ತೆ ಮತ್ತೆ ಗೆಲ್ಲುವೆ

ಗೆಲುವೆಂಬ ಕುದುರೆಯನು

ಹತ್ತಿ ಓಟ ಓಡುವೆ  |

**

(ಈ ಕವಿತೆಯನ್ನು ಬರೆದಿರುವುದು 1-08-2014ರಂದು ಶಿರಸಿಯಲ್ಲಿ)