ಟೈಂಪಾಸಿಗಷ್ಟು ಹನಿಗವಿತೆಗಳು

48.ಮೋಸ

ಆಕೆಯ ಸುಂದರ ದಂತದ

ಮೋಡಿಗೆ ಬಲಿಯಾದ

ಮೋಸ ಹೋದ ನನಗೆ

ಕೊನೆಗೆ ತಿಳಿದಿದ್ದು

ಅದು ಹಲ್ಲುಸೆಟ್ಟು..!!

49.ತಾಳಿ

ಹರೆಯಕ್ಕೆ,

ಯವ್ವನದೊಡಲಿಗೆ

ಸಿಕ್ಕ ಒಂದು 

ಕಡಿವಾಣ

ಗಂಡಿನ ಲಗಾಮು..!!

50.ಸೂರ್ಯ

ಭೂಮಿಯೊಡಲ 

ಸಂಪತ್ತನ್ನು ಹುಡುಕಲು 

ದೇವರು ಬಿಡುವ 

ಟಾರ್ಚು..!!

51.) ಮದುವೆ

ಮದುವೆಯೆಂದರೆ

ಮಧುರ ಜೀವನ

ಕಳೆದು ಹೋಗುವ

ಒಂದು ವೇ..!!

52)ಸ್ವಾತಂತ್ರ್ಯ ದಿನ

ದೇಶ

ಬ್ರಿಟೀಷರ ಕೈ ತಪ್ಪಿ

ರಾಜಕಾರಣಿಗಳ ಕೈ 

ಅಪ್ಪಿದ ದಿನ..!!

53.ಚಪ್ಪಾಳೆ

ಸಭೆಯ ಮಾತು ಕೇಳುತ್ತಿದ್ದ

ಸಭಿಕರು ಚಪ್ಪಾಳೆ ತಟ್ಟಿದರು.

ಮಾತು ಮುಗಿಯಿತೆಂದು,

ಜೊತೆಗೆ ಮಾತನ್ನು 

ಮುಗಿಸಲೆಂದು..!!

54.ಪತ್ರಕರ್ತ

ಪತ್ರಕರ್ತನಾಗಲೆಂದು

ದಾರಿ ಹುಡುಕಿ ಹೊರಟ ನಾನು

ಆದೆ ಮುಂದೆ

ಪುತ್ರಕರ್ತ..!!

55.ದುಂಡೀರಾಜ

ಕವನ ಬರೆಯುವ ಮುನ್ನ 

ನಾನಾಗ ಬಯಸಿದ್ದೆ ದುಂಡೀರಾಜ..!

ಕವನ ಬರೆದು ವಾಚಿಸಿದಾಗ

ಜನರೆಂದರು, ನೀನು, ನಿನ್ನ ಕವನ 

ದಂಡ ರಾಜಾ..!!

56.ಹೋಲಿಕೆ

ಕುವೆಂಪು ಕವನಗಳೆಂದರೆ

ಕಿವಿಗಿಂಪು, ಕನ್ನಡದ ಕಂಪು,

ಭಾವನೆಗಳ ಸೋಂಪು, ಮನಕೆ ತಂಪು..!!

ನನ್ನ ಕವನವೆಂದಕೂಡಲೆ

ಬರತೊಡಗುತ್ತದೆ ಕಣ್ಣಿಗೆ

ನಿದ್ದೆಯ ಜೋಂಪು..!!

57.ದಂತದ ಬೊಂಬೆ

ಮಹಾನ್ ಕವಿಯೊಬ್ಬ ತಾನು

ಪ್ರೇಯಸಿಯ ಹೊಗಳುತಿದ್ದ

`ಪ್ರಿಯೆ, ನೀನು ದಂತದ ಬೊಂಬೆ..'

ಅದನ್ನು ಕೇಳಿದ ಪ್ರಿಯೆಯೆಂದಳು

`ಕ್ಷಮಿಸು ಪ್ರಿಯಾ..,

ನಾನು ವೀರಪ್ಪನ್ ಗೆ ಬಲಿಯಾಗಲಾರೆ..'