ಮಾತಾಡು ಮಲ್ಲಿಗೆ

ಮಾತಾಡು ನನ್ನ ಮಲ್ಲಿಗೆಯೇ
ಆ ಬದುಕು ಬರಡಾಗಿಸುವ
ಮೌನವೋಡಿಸಲೊಮ್ಮೆ |
ಆ ಗ್ರೀಷ್ಮದುರಿಯ ಬೆಂದು ತಿನ್ನುವ
ಬಿಸಿಲೆಡೆಗೆ ತಂಪಾಗಲೊಮ್ಮೆ |

ಬತ್ತಿ ಹೋದ ಒಡಲ ಭಾವನೆಗಳು
ಚಿಗಿತು ಹಸಿರಾಗಿ ನಳನಳಿಸಲೊಮ್ಮೆ |
ಮನ ಕೊರೆವೇಕಾಂತವ ಹಿಡಿದು
ಬಡಿದು ಓಡಿಸಲೊಮ್ಮೆ |
ಖಾಲಿಯಾಗಿರುವ ಕವಿಮನಕ್ಕೆ
ಸ್ಪೂರ್ತಿಯಾಗಿ ಕವನ ಬರೆಸಲೊಮ್ಮೆ ||

ಮಾತಾಡು ನನ್ನ ಮಲ್ಲಿಗೆಯೇ
ಹೆಚ್ಚೆಲ್ಲ ನುಡಿ ಬೇಡ |
ಒಂದೆರಡು ನುಡಿ ಸಾಕು. ಇಷ್ಟು
ದಿನಗಳ ಕಾಯುವಿಕೆಗೆ, ಕಾತರಿಕೆಗೆ
ಮೌನವ ಮರೆಸುವಿಕೆಗೆ |
ಸ್ಪರ್ಷ ಬೇಡ, ಮುತ್ತೂ ಬೇಡ
ನಿನ್ನ ಮಧುರ ಮಾತೆರಡಷ್ಟೇ ಸಾಕು |
ಜೊತೆಗಷ್ಟು ಬೆಚ್ಚ ನಗು, ನಟ್ಟ ನೋಟ
ಅಷ್ಟು ಸಾಕು, ಅಷ್ಟೇ ಸಾಕು ||

***
(ಈ ಕವಿತೆಯನ್ನು ಬರೆದಿರುವುದು 02-09-2006ರಂದು ದಂಟಕಲ್ಲಿನಲ್ಲಿ)