ಪ್ರೀತಿ-ಶಾಂತಿ

ಪ್ರೀತಿ ನನ್ನ ಜೀವನ
ಶಾಂತಿ ನನ್ನ ಸಾಧನ
ಮನದಿ ಹಲವು ಭಾವನ
ಪ್ರೀತಿ-ಶಾಂತಿ ಕ್ಷಣ ಕ್ಷಣ ||

ಪ್ರೀತಿ-ಪ್ರೀತಿ ಭಾವನ
ಮನಸಿಗೊಂದು ಸಿಂಚನ
ಇಂದು ನನ್ನ ಚೇತನ
ಆಯಿತಲ್ಲ ಸ್ಪಂದನ ||

ಬಾಯಲೇನೋ ಹೊಸತನ
ಶಾಂತಿ ಮಂತ್ರ ಮಣ ಮಣ
ಯುದ್ಧ ಭೀತಿ ಬಂಧನ
ಮಾಡು ನೀ ವಿಮೋಚನ ||

ಪ್ರೀತಿ-ಶಾಂತಿ ತನನನ
ಸೇರಿದೆಡೆ ಚಿಂತನ
ಹರಡಲೊಂದು ಗಾಯನ
ಮುರಲಿ ಮುರಲಿ ಮೋಹನ ||

ಪ್ರೀತಿಯೊಂದು ಕೇತನ
ಶಾಂತಿಯೊಂದು ನರ್ತನ
ಪ್ರೀತಿ-ಶಾಂತಿ ಕೀರ್ತನ
ಮಾಡಲಿ ಅನಿಕೇತನ ||

****

(ಈ ಕವಿತೆಯನ್ನು ಬರೆದಿರುವುದು 19-10-2005ರಂದು ಶಿರಸಿಯ ಎಂ.ಇ.ಎಸ್ ಕಾಲೇಜಿನಲ್ಲಿ)
(ಕವಿತೆ ಬರೆಯಲು ಯಾರು, ಯಾವುದು ಸ್ಪೂರ್ತಿ ಎಂದು ಹೇಳುವುದು ಕಷ್ಟ. ಈ ಕವಿತೆಗೂ ಹಾಗೆಯೇ. ಕಾಲೇಜಿನಲ್ಲಿ ಡೆಸ್ಕಿನ ಮೇಲೆ ಹಲವರು ಹಲವು ರೀತಿಯಲ್ಲಿ ಬರೆಯುತ್ತಾರೆ. ಕುತೂಹಲದಿಂದ ನಾನು ಕಾಲೇಜು ದಿನಗಳಲ್ಲಿ ಅವನ್ನು ಓದುತ್ತಿದ್ದೆ. ಹೆಚ್ಚಿನವು ಡಬ್ಬಲ್ ಮೀನಿಂಗು ಆಗಿದ್ದರೆ ಇನ್ನೂ ಬಹಳಷ್ಟು ಸೆನ್ಸಾರ್ ಪ್ರಾಬ್ಲಮ್ಮಿನವುಗಳಾಗಿದ್ದವು. ಕುತೂಹಲದಿಂದ ಓದುತ್ತಿದ್ದ ನನಗೆ ಡೆಸ್ಕಿನ ಮೇಲಿನ ಅನಾಮಧೇಯ ಬರಹಗಳಲ್ಲಿ ಹೇಳಿಕೊಳ್ಳಲಾಗದ ಪ್ರೀತಿ, ಭಗ್ನ ಪ್ರೇಮ, ಕಾಮ ಇತ್ಯಾದಿ ಕಾಣಿಸುತ್ತಿದ್ದವು. ಇದೂ ಕೂಡ ಅಂತದ್ದೇ ಒಂದು ವಾಕ್ಯದಿಂದ ಸ್ಪೂರ್ತಿಯಾಗಿ ಬರೆದ ಕವಿತೆ. ಯಾರೋ ಅನಾಮಧೇಯ ವ್ಯಕ್ತಿ ಡೆಸ್ಕಿನ ಮೇಲೆ ಪ್ರೀತಿ ನನ್ನ ಜೀವನ, ಶಾಂತಿ ನನ್ನ ಸಾಧನ ಎಂದು ಬರೆದಿದ್ದ. ಅದೇ ಎಳೆ ಇಟ್ಟುಕೊಂಡು ಬರೆದಿದ್ದೇನೆ ಅಷ್ಟೆ. ನೋಡಿ)